بحاول أفهم .. حاجه تغيظ

*أخيرا فيه اشاعه بتقول ان الدكتور السباعي الطبيب الشرعي بتاع البانجوا هيتحقق معاه بموجب مستندات فساد
يا ريت متكونش اشاعه ويكون بجد عشان حق خالد واللي زيه ميروحش هدر وعشان ييجي واحد نثق فيه لما يكشف
علي المخلوع اللي الواحد مبقاش فاهم له حاجه هو عيان وللا مش عيان يعني ايه حالته جيده ومستقره لكن لا نستطيع
نقله الي طره لخطورتها .. اطباء اكدوا ان الحاله اللي عنده حالة شيخوخه فقط لا غير وان نقله مش خطر يبقي الحل ايه ..
نصدق مين الطبيب الشرعي الضلالي وللا الاطباء التانيين !!!؟؟

* أخيراااااااااااا توصل البابا والمفتي لإتفاق لحل مشكلة كا ميليا شحاته واخواتها .. الواحد نفسه يخلص من الازعاج ده
 عشان تبطل حجج السلفيين .. ويتكشفوا .

* من أيام عمنا الجبرتي اتعلمنا ان التاريخ بتكتب مرتين مره في عمر الحاكم ومره بعد ما يموت .. الجيل ده غير القاعده
وبيكتب حاليا التاريخ في حياة حكامه منهم من خُلع ومنهم من ينتظر .. لكنهم في النهايه شايفين وسامعين
وعارفين وفاهمين انهم مشرفين في مزبلة التاريخ.

*كل اللي عنده طلب او مشكله بيطلع يقطع الطريق او السكه الحديد لما بقت حاجه تنرفز بس الواحد بيعذر الناس لان ده بقي الاسلوب الوحيد للاستجابه للناس.. هو ده الفرق الوحيد بين قبل الثوره وبعدها!! قبل الثوره مكنش حد بيعبرهم ولو ولعوا في نفسهم لكن بعد الثوره ممكن يكون فيه استجابه بمجرد قطع الطريق .. وبعدين نلاقي واحد في الحكومه طالع يتكلم عن هيبة الدوله .. مانتوا اللي ممرمطين هيبة الدوله في الارض لان دايما استجابتكوا متأخره ..

* لسه في مسئولين في الحكومه والمجلس العسكري مش قادرين يستوعبوا ان شعب مصر اللي كان قبل 25 يناير غير شعب مصر بعد 25 يناير وشعب مصر الجديده مش هيسمح لحد انه يتجاهلوا تاني .

نفسي أفهم ..وللا أحسن مفهمش !!!!!!!

مش عارفه .. الواحد بقي حاسس انه مش فاهم حاجه؟؟ أو فاهم وبيسعبط وعامل مش فاهم لحسن يتنقط ويتفرس.... ليه؟؟ بسبب الحاجات اللي عماله تحصل حوالينا عن عمد او عن جهل علشان تخلي الشعب يلعن ابو الديمقراطيه والساعه اللي فكر فيها انه يعيش في بلد ديمقراطي .. زي ايه ؟؟ خد عندك

*مظاهرات السلفيين اللي كل يوم طالعه بمناسبه ومن غير مناسبه ولأهداف غير المعلنه طبعا واللي بتصب في صالح الثوره المضاده
مره كاميليا شحاته مره بلطجه علي المساجد مره هدم الاضرحه مره عايزين يقيلوا المفتي علشان صرح برأي جمهور الفقهاء في ان النقاب عاده عايزينه يغير راي جمهور الفقهاء علشان رأي ائمتهم الضلاليين اللي بيفصلوا الفتاوي علي حسب المعلوم .

* بمناسبة هدم الأضرحه سؤال برئ للسلفيين ليه محدش هدم ضريح ابو حصيره اللي اليهود عاملينه مسمار جحا واللي كان هيسعد المصريين ولا حتي بتجيبو سيرته ؟؟!!!! ليه اكتفيتوا بهدم أضرحة الصوفيين ؟؟؟؟!!!!هو مش ده ضريح زيهم برده !!!!!!!


* هوليه المصدر العسكري اياه كل ما الحكومه تنفي مسألة الوساطه بتاعة السعوديه والامارات للافراج عن مبارك ينط سياده المصدر ويؤكد للصحافه ان ده حصل فعلا .. يا ريت سياده المصدر يقول اسمه لأننا مش هنصدق مصادر مجهوله تاني 

*أتباع مبارك بتوع اسفين يا ريس بعد ما كانو بتظاهروا علشان يرجعوه دلوقت بيتظاهرو علشان ميتحاكمش بحجة انه رمز مصر 
مصر ملهاش رموز غير الهرم وأبو الهول والنسر اللي علي العلم .. أهو ده اللي ناقص يبقي رمز مصر واحد حرامي وشيخ منصر!!!

*في عيد العمال فيه احتفالين احتفال عمال الثوره ونقاباتهم المستقله وده طبعا في ميدان الثحرير والتاني احتفال اتحاد العمال االفلولي وده كالعاده في التكييفات ومحدش من الشعب هيعبره غير الفلول .. انا مش فاهمه الحكومه صابره علي الاتحاد ده لغاية دلوقت ليييييييييه اذا كان العمال اللي شاركوا في الثوره وكانوا عامل اساسي في نجاحها رفضينه يبقي لازمته ايه ..!!!!!!!!!!!

* كتير من المسيحيين مش فارق معاهم موضوع كاميلا شحاته ده أصلا .. ومع ذك الكنيسه عامله ودن من طين وودن من عجين
ولا كأنها شايفه وسامعه ان فيه ناس عايزه تستغل الموضوع ده لاشعال الفتنه .. يعني لو الموضوع ده فيه تفاصيل تسئ للكنيسه او اي حد خلاص يا جماعه الناس هنعذركوا لاننا عارفين ان  امن الدوله كانوا بيلعبوا بموضوع الفتنه الطائفيه ده لخدمة اهداف النظام السابق يعني أي حد اتورط ايام النظام السابق ممكن الناس تعذره بس ينتهي الموضوع ده مصر أهم من 100 كاميليا شحاته .

*الواحد عايز يفضل يحب الجيش ومش عايز يظن فيه ظن سؤ علشان كدا لازم اللواء عتمان يوضح معني الكلام اللي قاله عن الشباب اللي بياخد دولارات والبنات اللي كشفوا علي عذريتهم إلي أخره ..عايزن الشعب والجيش دايما ايد واحده .

*انا من الناس اللي قالو لا للتعديلات الدستوريه ومكانش عاجبني مقال الأستاذ فهمي هويدي عن هواجس النخبه بس بعد كل المده دي اكتشفت ان كان عنده حق والاعتراف بالحق فضيله الجيش لازم يمشي النهارده قبل بكره مش عشان احداث 9 مارس ولا 9 ابريل ولا اي حاجه من اللي اتقالت عليه .. لازم يرجع ثكناته عشان الايدين اللي مصره تلعب لافساد العلاقه بينا وبينه عايزين نفضل ايد واحده ضد اي حد عايز يضيع مكتسبات الثوره .

و للحديث بقيه  ...

فتنه مع سبق الأصرار والترصد !!

من يوم ما انتصرت المرحله الاولي من الثوره وربنا كرمنا بخلع اللي ما يتسمي وعصابته وفجأه لقينا حاجات غريبه بتحصل فجأه نلاقيها ابتدت وفجأه نلاقيها انتهت بمجرد ما تفشل في تحقيق أهدافها اولها  المظاهرات الفئويه اللي انتشرت كالنار في الهشيم ،الفتنه الطائفيه واحداث المقطم والسيده عائشه ، البلطجه وترويع طلبه المدارس والكليات ، محاولات ترويع الاقباط بالسلفيين وحادث قطع الأذن اياه (مش فاهمه من امتي الحدود فيها قطع أذن) ،حالات هدم الأضرحه واثارة فتنه بين الصوفيين والسنه المعتدلين والسلفيين ..محاوله اثارة الفتنه بين الجيش والشعب يوم جمعة التطهير،و اخرها حادث ابو قرقاص ومحاولة تحويل مشكلة قنا من رفض جماعي للمحافظ وتصويرها علي انها فتنه طائفيه مين المستفيد من الكلام ده كلنا بنقول الثوره المضاده ده كلام جزء منه صح فلول النظام السابق لهم مصلحه في اللي بيحصل لانهم كانوا شلة منتفعين وفاسدين يعني معندهمش ريحة الانتماء لمصر ولما يخربوها  هيضمنوا انهم يعيدوا انتاج النظام القديم بوجوه جديده تطنش علي جرايمهم أو علي الأقل لما يهربوا باللي سرقوه محدش هيدور وراهم ما احنا هنبقي مشغولين في المصيبه اللي هم وقعونا فيها وعايزين ننقذ ما يمكن انقاذه .. ده غير ان الثوره المضاده مش فلول النظام وبس فيه دول كتير تتمني الخراب لمصر طبعا اولها اسرائيل اللي عارفه ومتأكده ان التطبيع معاها كان غصب عن عين الشعب المصري واللي من يوم ما اتخلع اللي مايتسمي ساستها عمالين يولولوا زي اللي غيطهم غرق .
والحقيقه ان غيط سياستهم في مصر برعاية ابو الغيط غرق فعلا ومفيش قدامهم حل غير انقاذ ما يمكن انقاذه.. انقاذه ازاي !! بإثاره مشاكل داخليه في مصر تشغلها عن أهدافها الاستراتيجيه وتخليها مكفيه طول الوقت !!تحاول تصلح نزاع طائفي هنا ومشكله فئويه هناك وهلم جرا وطبعا مننساش دورامريكا في الثوره المضاده اللي صعبان عليها ان مصر تخرج من تحت جناها وترفرف لوحدها وحسب مصالحها واهدافها هي .. مش حسب مصالح ماما امريكا وبنتها الغير شرعيه اسرائيل وسيبك من دول بقي وادخل علي الدول العربيه اللي فيها دول تدفع نص عمرها و ميحصلش تحول ديمقراطي في مصر وكمان مبارك ميتحاكمش لان معني ده ان مصر عملت الباترون الاساسي وعلي باقي الشعوب العربيه التفصيل علي المقاس  وده اللي حصل فعلا في ميدان التحرير في مصر وانتشر في باقي ميادين التحرير العربيه  الكلام ده تقريبا كلنا عارفينه وفاهمينه وكمان متوقعينه من يوم الخلع أصل احنا مش أول ثوره يحصل معاها كدا.. ولا أخر ثوره يحصل معاها كدا .. وطالما احنا عارفينه وفاهمينه وواعيين له انشاء الله هنتجاوزه .. لكن المشكله الأكبر في اعتقادي الشخصي مش في الثوره المضاده لكن في الناس اللي كانوا في ميدان التحرير ومع الإنفتاح الديمقراطي عايزين يستغلوا الثوره المضاده لتقمص أدوار معينه وتحقيق بطولات وهميه علي حساب الناس الغلابه وباستغلال الدين والعصبيه .. والحقيقه ان دول اخطر ناس علي الثوره لأن كل ما عملت الثوره المضاده حريق جريو هم ونفخوا فيه عشان يكبروا الحريقه وبعدين يطفوها ويعملو فيها ابطال زي ما قلت ودول طبعا بعض الجماعات الاسلاميه  مش كلهم وبعض أقباط المهجر  وهدفهم واضح زي عين الشمس السيطره علي عقول الناس وزي ما احنا شايفين بيلعبوا لعبتهم في الصعيد والمناطق النائيه لأنهم فاهمين كويس ان النجاح في الإنتخابات بدايته ونهايته في القري والنجوع ..
وده أسوأ استغلال للدين وأخطر علي الثوره من أمريكا واسرائيل وفلول الحزب الوطني . 
طول عمرنا عايشين في مصر مسلم ومسيحي وصوفي وسني بناكل ونشرب مع بعض بنخرج ونعيد مع بعض بنتفق أكتر ما بنختلف دايما كنت بشوف ان الحلال والحرام عندنا واحد والصح والغلط واحد لان الدين في مصر بقي جزء من العادات والتقاليد المصريه عشان كدا احنا بنتفق في حاجات أكتر من اللي بنختلف عليها .. يبقي ايه سبب الفتن دي غير انها فتن مع سبق الاصرار والترصد لاسباب خارجيه أو داخليه أو انتخابيه  خصوصا واحنا بقينا عايشين في زمن تجارة الدين فيه بقت تجاره رائجه تستغل فيه أول بند في مثلث التخلف (الجهل والفقر والمرض) .. المثلث ده هو الحاجه الوحيد اللي حصل لها اكبر تنميه في عهد مبارك ومش المفروض اننا ندفع تمنها في عهد الثوره .. اما عارفه ان الحكومه أعبائها كبيره بس ده شئ عاجل مينفعش نستني عليه لازم المثقفين ينزلوا للناس دي ويتكلموا معاهم ويوعوهم المصريين الحقيقيين مش في ساقية الصاوي المصريين الحقيقيين هم اللي معتصمين في قنا وهم اللي عندهم مشكله مفتعله افتعالا في المنيا وهم اللي قطعوا الطريق عشان مش لاقيين عيش في أسيوط وهم اللي عايزين يرجعوا لارضهم الاصليه في النوبه.  

و بتمني انه في أقرب وقت يصدر قانون يعاقب وبشده من يحرض علي الطائفيه أو يدعمها بالقول أو بالفعل ويكون عقابه رادع وأتمني من الله ولا يكتر علي الله ان ده يكون قبل الإنتخابات  اذا كنا نريد ان تمر بسلام وتحقق النتيجه المرجوه منها وهي التمثيل الحقيقي لإرادة الشعب  المصري  الواااااعيييي

بكره وبعدو ......

تقرير أمريكي عن "مستقبل مصر" قبل الثورة بعام واحد بعنوان " مصر لن تصبح "أم الدنيا" بعد مبارك
انا مش فاهمه الناس اللي حزنانه علي مبارك دي حزنانه علي ايه ؟  طيب انتو مش حاسين بحالة البلد طب طرش وعمي مش سامعين وشايفين ما يكشف كل يوم من فساد عيلة مبارك ومراته وعياله  ووزرائه ..مش قادره اعذرهم وأقول انهم بيحبوه لوجه الله لان مفيش مبرر واحد للحزن عليه غير إنهم كانو من المستفيدين منه او انهم مأجورين عشان يقرفونا في عيشتنا
وعمالين يتكلموا عن انجازات وهميه لمبارك.. دا مبارك كان فاسد من ايام ما كان نائب رئيس متورط هو وحسين سالم حرامي الغاز في قضيه في أمريكا البيت الابيض غطي عليها لما بقي رئيس لان ريجان قال انها ممكن تضر بعلاقات مصر و أمريكا !! والسادات كان هيغيره لولا حادث المنصه وارادة ربنا انه ييجي يكبس علي نفسنا 30 سنه وينتهي النهايه السودا المذله دي اللهم لا شماته .
الناس كلها بتتكلم علي الانفلات الامني بعد الثوره وكانها قبل كدا كانت عايشه في بلد الامن والامان .. دا الواحد كان يروح الاسم يشتكي يطلع متهم فيه بلطجه اكتر من كدا .. كان الشاب يبقي ماشي في امان الله ولو شكله غلبان ومعجبش الظابط يلبسه مصيبه وان معترفش علي شئ معملوش يبقي الله يرحمه ويصبر اهله .. تفاقم مثلث التحلف الجهل والفقر والمرض وزادت البطاله زادت معدلات جرائم السرقه والقتل علي حاجات تافهه.. انقرضت الطبقه الوسطي وأصبح الغني يزداد غني من النهب والسرقه عيني عينك والفقير يزداد فقراً ومرضاً وجهلاً وممنوع الشكوي ولا حتي لله وإلا أمن الدوله أولي بيك  .. تفاقمت ظاهرة أطفال الشوارع وأصبحت تنذر بقنبله موقوته تشكل خطر علي الامن والسلم الاهلي ارتفعت الاسعار ارتفاع جنوني وكل ما حد يشتكي تلاقي المسئول اللي مشرف في بورتو طره دلوقت بيقولك الارتفاع ده في العالم كله .. ماشي بس لما بترخص في العالم كله ما بترخصش في مصر ليه؟!!
كل المناصب بقت لأهل الثقه مش لاهل الكفاءه فبقي الوزير بدبلوم الصنايع والاعداديه واصحاب المؤهلات العليا قاعدين علي القهوه لانهم معندهمش أهم مؤهل وهو بوس الايدين والرجلين لو أمكن لما كل الكفآت طفشت من البلد.. ولما الشعب يفتح بقه يقولوا له نجيب لكوا منين بطلو خلفه عشان نكفيكوا .. طب ما تبطلوا سرقه انتو عشان غير كوا يعرف يعيش .. والفتنه الطائفيه حدث ولا حرج أول رئيس يوقع بين الشعب في بعضه عشان يورث حطامه لابنه ..ده غير سمعة مصر والمصريين اللي بقت في الأرض حصار غزه.. السكوت عن قتل الفلسطينيين.. المشاركه في جرائم اسرائيل وامريكا بذريعة الارهاب.. ضياع العراق.. تقسيم السودان  ...إلخ 
وكله كوم وأزمة مياه النيل كوم دي لوحدها تجيب لمبارك اعدام بالراحه  لانها تندرج تحت جريمة الخيانه العظمي
طب ايا الفرق بين الاحوال قبل الثوره وبعد الثوره ؟
ده سؤال مشروع وإجابته في كلمه واحده وهي الأمل !!
أيوه الامل ..
الامل في إن بكره يكون أحسن
لكن ده مش هيحصل في يوم وللا اتنين ده هياخد وقت وجهد وعايز صبر بس الاهم اننا منفقدش الأمل في بكره لان المجحوم مبارك سايب مصر خرابه وكان عايز كما يورثها لابنه عشان كنا نصحي في يوم منلاقيش حاجه اسمها مصر لكن عشان مصر ربنا حافظها وحارسها جعل ثورة 25 يناير سبب لانقاذها من مستقبل مظلم ربنا  وحده يعلم كان ممكن يكون عامل ازاي
عشان كدا لازم نثق في نفسنا أكثر ونحب بلدنا أكثر ونصبر أكثر والامل هو اللي يكون عنوان حياتنا بكره وبعده .. واللي بيعيط علي مبارك يتفلق

الشعب يريد تفسير الاحداث!!

مؤرخين وكتاب كتير كانوا  دايما يقولوا ان الشعب المصري لا يثور إلا لأمرين اثنين اما لقمة العيش وإما ان تمس عقيدته بسوء وكنت ومثلي كثيرون ناخد كلامهم امر مسلم به اما لثقتنا بهم أو لانه كلام عليه بعض الشواهد التاريخيه لكن  من غير تدقيق وتمحيص و ممكن اعتبر ان تقييم تلك الاراء في وقتها كان بيتوافق مع حالة الاحباط الإجتماعي والسياسي اللي كنا بنعاني منه كشباب سدت أمامه كل الطرق وكنا مضطرين نقبل الكلام ده كتبرير للوضع مش كتفسير له واللي خلاني افهم مسألة الفرق بين التبرير والتفسير دي اني  مره وانا قاعده اقرا عن ثورة عرابي ولاول مره توقفت عند مقولته الشهيره واللي كنا بنمر عليها مرور الكرام  (لقد خلقنا الله احرارا ولم يخلقنا تراثا ً أو عقاراً.. فوالله الذي لا إله إلا هو لن  نورث ولن نستعبد بعد اليوم) قلت لنفسي ايه ده يا بنت الراجل اهوه بيقول كلام زي الفل و يتوزن بالدهب والماس الناس مش ثايره عشان الاكل ولا الدين ماهي ثايره عشان الحريه أهه  يعني ناس فاهمه وعارفه بالفطره ان الحريه هي اللي هتجيب الخبز و هي اللي هتحمي الدين .. نطلع علي ثورة عمنا سعد زغلول نلاقي الهدف برضه كان الحريه والتخلص من الاستعمار ..   قلت أه واضح ان الناس دي بتحاول تبررلنا الخيبه اللي احنا فيها مش تفسر لنا التاريخ بأمانة العلماء  دا احنا بالمنطق ده هنلاقي نفسنا متخلفين ثقافيا وسياسيا عن مصر ثورة عرابي  و مصر ثورة 19  والمسأله بدأت تكبر وتتفاقم في السنوات الاخيره مصر تقوقعت علي نفسها .

مصراللي اختصروها عن عمد في  مبارك وبقت مصر مبارك و اللي همشت الشعب والتاريخ والجغرافيا والسياسه والاقتصاد لصالح مصالح متعارضه مع مصالح  مصر الشعب .. يانهار يانهار!!! احنا في القرن ال 21 ومتخلفين عن القرن ال19 مين المسئول عن ده ومين اللي وصلنا ليه ؟؟!! احنا وللا اهالينا وللا ثورة يوليو وللا السادات وللا  مبارك وللا المجتمع علي بعضه مين اللي خلي واجهة المجتمع في القرن ال21 هم العوالم وركن العلماء والادباء  علي جنب .. مين اللي حاصر المفكرين والمثقفين وسفه القيم النبيله   وطبل وزيط  للتافه السقيم إلخ.. ........

كتير من المصريين كان قلبهم حاسس ان فيه ثوره جاييه بس هيكون شكلها ايه .. ايه أهدافها مين اللي هيقوم بيها ايه هي القشه اللي هتقصم ظهر البعير وتؤدي لانفجارها خصوصا ومصر بقي لها كام سنه في حالة تمهيد .. اضرابات واعتصامات ووقفات احتجاجيه  في كل مكان صحيح محدش كان بيعبرهم بس كانت محاولات .. او تمهيدات  لحدث ما !!  

امتي هيحصل ازاي هيبدأ!؟! الله أعلم !! ناس كتير اعتقدو انها هتكون ثورة جياع نظراً لتفشي الفقر والجهل والمرض .. ويمكن اعتمدو التبريرات اياها كتفسيرات مزعومه  للتاريخ !!

وانفجرت ثورة 25 يناير من رحم القهر والظلم والفقر والجهل والمرض !!والمفاجأه انها كانت ثورة كرامه وحريه وعداله اجتماعيه أيضا كسابقاتها لان المصري بالفطره فاهم ان العداله والحريه هيجبوا الكرامه والخبز او (الخبز بكرامه، الحياه بكرامه ،والموت بكرامه)

 الحقيقه المُره ان كل شخص كان بيبرر اللي كان بيحصل قبل الثوره  مسئول عنه ومشارك فيه ولازم يحاسب نفسه قبل ما الناس تحاسبه يمكن القانون ميقدرش يحاسبه علي جريمه احباط اجيال من المصريين لكن الضمير الجمعي المصري لن يقبله

زمن التبريرات انتهي وزمن التفسيرات الواضحه الصريحه هو اللي يتناسب مع افاق واهداف ثورة الكرامه ومع زمن الحريه والديمقراطيه

 لان بعد ثورة 25 يناير مش مقبول ان يتم تبرير اي شئ .. كل الناس عايزه تفسير واضح لكل حاجه بتحصل في البلد من أول نظافة الشارع وأزمة الانابيب والعيش  والإنفلات الامني لغاية سبب ابقاء المجلس العسكري علي د يحي الجمل ابو لسان زالف  رغم رفض الناس له بلا استثناء  والتغيير العجيب في المحافظين والذي لا يتفق مع مبادئ الثوره التجاهل المستفز للناس في قنا لما المشكله كبرت  .. يا ساده زمن التبريرات اللي صدناقنا في يوم من الأيام عن سذاجه او قلة حيله  وزمن قبولها كحل للهروب من مواجهة الحقيقه  انتهي خلاص الشعب اصبح يثق بنفسه وقدراته..  

ولذلك  الشعب يريد تفسيركل حدث مهما كان

ولن يقبل بتزوير التاريخ مره أخري بالتبرير تحت مسمي التفسير

مصر المحروووسه

انا  بعشق مصر و تاريخ مصر ودايما لما اقرا التاريخ كنت استغرب و اسال نفسي هو ليه مصر اسمها مصر المحروسه طب بامارة ايه محروسه دي طول عمرها منهوبه منحوسه موكوسه بحكامها  المهم اني مكنتش لاقيه مبرر لكلمة محروسه ولاني من الجيل اللي المخلوع قضي علي احلامه وطموحاته لميت عزالي انا واسرتي وسيبنا البلد وسافرنا بعد ما يئسنا ناخد ابسط حقوقنا في حاجات كتيير.. المهم رحت في زياره لمصر ورجعت قبل الثوره بعشر ايام رجعت مقهوره !!

وحزينه من الحاله اللي شفت مصر وصلت لها مفيش سواق

تكسي ركبت معاه ومن غير ما افتح بقي معاه وبمجرد ما تحصل

اي حاجه في الشارع الاقيه انفجر شتيمه !

في الحكومه والشعب مع بعض لدرجة ان واحد منهم قعد يقول

علي الشعب المصري انه شعب ميت.. والله العظيم انا صعبت

علي نفسي وبكيت مره لما لقيت واحد بيسرق كيس اكل من

واحد بتاع دليفري

وقلت يانهار اسود!!! هي مصر وصلت للدرجه دي!!!!!!!!!!!

 الناس مش لاقيه تاكل الله يخرب بيتك ياللي كنت السبب

ورجعت اقول تاني هي

اسمها ليه مصر المحروسه !!!!؟؟ بامارة ايه !! المهم رجعت

الي البلد الذي اعيش فيه واول ما وصلت زوج احتي استقبلني

في المطار وسألني عن احوال مصر ؟؟

قلت له شفت تونس  ؟ قاللي ايوه قلت له مصر هيحصل فيها

كدا في اقرب ما تتخيل

بس الشهاده لله انا كنت متوقعه ثورة جياع تؤدي لفوضي لأن

الاحوال الاقتصاديه تشير لكدا  ..  

تاني يوم فتحت الفيس بوك علي صفحة كلنا خالد سعيد لقيت

الدعوه ليوم 25 يناير مخطرش في بالي ان ده هيكون بشاير

ثوره حضاريه تخلع المخلوع وتنضف مصر من العفن اللي 

عشش فيها.. طبعا لبدت قدام الجزيره لحد ما جت جمعة الغضب

اكتشفت اليوم ده ليه مصر اسمها مصر المحروسه واني عندي

قصر نظر  الحقيقه اني اكتشفت ان مصر مش محروسه

بمادياتها مصر روحها هي اللي محروسه .. يمكن الروح دي

تخبو شويه لكن لا تنطفئ ابدا

هي دي مصر المحروسه بروحها.. وروحها هي شبابها..

وشبابها هو حاضرها ومستقبلها..

انا عملت مدونه قبل كدا كتبت فيها الكلام ده لكن اكتشفت ان

اسمها لا يعبر عما اريد ان اقوله فغيرت الاسم لأن

ميدان التحرير هو المكان الرمزي اللي ممكن يتقال فيه أحلي

كلام وأي كلام يخرج من القلب يدخل للقلب ..